Oewerhengel Kliniek Deel 2: 'In Clip' metode

deur Michael Cato

Ons skop deel 2 van die reeks af, met die breedvoerige bespreking van die ‘In Clip’ metode op ‘n katrol. Die “In Clip’  metode word gebruik om akkuraat op dieselfde afstand te hengel om sodoende ‘n effektiewe voerkol te vorm.
Die ‘Clip’ waarna ons verwys is die ‘clip’ op die kant van die spoel op die meeste koffiemeul en ‘baitrunner’ katrolle wat tans beskikbaar is op die Suid Afrikaanse mark. Die algemene gebruik van hierdie ‘clip’ deur hengelaars in ons land is om die lyn in te haak nadat daar gehengel is, alhoewel dit nie verkeerd is nie, het die ‘clip’ inderdaad ‘n baie belangriker doel, en dit is om op ‘n sekere afstand te kan hengel deur in te haak op die ‘clip’.

Kom ons verduidelik in breer terme hoe die in haak werk.  Eerstens moet daar bepaal word op watter afstand daar gehengel gaan word. Dit kan bepaal word deur inligting te verkry van ander hengelaars of deur eie ondervinding. Die algemene riglyn by die meeste oorde is een stok op 80m en die ander op 120m. Alhoewel dit net ‘n riglyn is, het die metode my al verskeie kere gehelp waar ek nie inligting voor die tyd, oor die betrokke oord, kon insamel nie.

Sodra die afstand bepaal is kan ons die afstand uit meet. Dit kan gedoen word deur die afstand uit te stap op die oewer of die meer akkurate  metode deur die afstand uit te meet met ‘n ‘Line mate’, die apparaat word op die stok gemonteer en word gebruik om akkuraat die hoeveelheid lyn af te meet wat deur die apparaat gaan en sodoende kan jy akkuraat jou spesifieke afstand bepaal. Die ‘Line mate’ is beskikbaar by die meeste hengelwinkels en is bekostigbaar en ‘n goeie belegging vir enige hengelaar.

Met die afstand afgemeet word die lyn op die spoel van die katrol dan in gehaak op die ‘clip’ om sodoende te verseker dat sodra jy werp dat net die hoeveelheid lyn afgegooi kan word tot teen die ‘clip’. Om te verseker dat die lyn nie breek, met die werp aksie, daar waar dit in die ‘clip’ gehaak is nie, moet die stok met die werp terug getrek word tot reg bo die hengelaar se kop en dan laat sak word sodra die aas net bo die water is, om sodoende die skok van die werp te absorbeer.

Met die ‘In Clip’ metode is jy verseker daarvan dat jy nou op presies dieselfde afstand elke keer gooi.



Dit is baie belangrik met die ‘In Clip’ metode om ook elke keer in dieselfde rigting te gooi om dit te kan afrond. Om te verseker dat jy elke keer in die dieselfde rigting gooi moet daar ‘n merker op die oorkantste oewer geidentifiseer word asook ‘n merker direk agter jou in lyn met die oorkantste merker.  Indien jy as middelpunt die twee merkers gebruik om ‘n lyn te vorm sal jy elke keer in dieselfde rigting gooi en met die ‘In Clip’ metode sal jy ook op dieselfde afstand gooi en dit verseker dat jy ‘n akkurate en effektiewe voerkol op die afstand bou wat die vis daar sal hou en dit sal verseker dat jy ‘n beter byt tempo kry.

Noudat ons presies verstaan hoe die ‘In Clip’ metode werk kan ons nou die 5 bolle per stok soos genoem in deel 1, gooi op ons bepaalde afstande en sodoende begin werk aan die voerkol. As jy aan ‘n klub behoort is spoedhengel een van jou groot faktore tot sukses en moet jy die ‘In Clip’ metode beslis gebruik.

Dit is nodig om jou werp/gooi aksie te gaan oefen om te verseker dat jy met elke gooi dieselfde hoogte gooi. Indien jy baie laag werp gaan jy verder gooi as iemand wat baie hoog gooi. Die hoogte wat die hengelaar gooi veroorsaak ‘n boog en die boog maak dat jy van die lyn gebruik wat ingehaak is en dit veroorsaak dat jy inderdaad minder afstand kry op die gooi.  Indien die hengelaar dan een hoe werp het en dan weer ‘n laer werp het sal die hengelaar nie op dieselfde afstand bly nie en inderdaad nie ‘n goeie voerkol kan bou nie, dus is dit noodsaaklik om jou werp aksie te oefen om te verseker dat die werp aksie presies dieselfde bly.  Menigte hengelaars maak die fout om nie ‘n konstante gooi aksie te oefen nie en sukkel dan om te verstaan hoekom ‘n ander hengelaar wat ook die ‘In Clip’ metode gebruik ‘n beter byt tempo as hulle het, die verskil is soms net dat die ander hengelaar se gooi aksie meer konstant is deur dat die hengelaar se werp aksie geoefen is en die hoogte elke keer baie dieselfde is. 

Korrekte gooi aksie

Baie belangrik om te onthou met die ‘In Clip’ metode is dat die voerkol nader aan die wal sal wees as die ingehaakte afstand.  As gevolg van die boog wat die lyn vorm deur die lug sal die ingehaakte gedeelte bereik word voor die betrokke berekende afstand bereik is. Dus as voorbeeld:

As die lyn op 80m ingehaak is en ons neem aan die hengelaar werp op ‘n konstante hoogte van 60 grade sal die aas gemiddeld op 75m land.

As die lyn op 120m ingehaal is en ons neem aan die hengelaar werp op ‘n konstante hoogte van 60 grade sal die aas gemiddeld op 110m land.

Voor ons by die aas aanbieding kom, moet ons eers stroppe bespreek. Die is baie belangrik dat ons moet besef dat daar meer as een hengel metode bestaan en dat ons die stroppe moet bepaal volgens die hengel metode. Die strop wat gebruik word vir sosiale oewerhengel om baie vis mee te vang is nie noodwendig dieselfde as die hengelaar wat aasboot hengel toe pas om groot karpe te vang. Die algemeenste strop vir die meeste tipes van oewer hengel is die Gly Rietvlei stop, waar die boonste hoek gly op die skag lyn.

Vir die artikel se doel gaan ek net twee stroppe bespreek. Vir die hengelaars wat baie vis wil vang gaan ek ‘n baie ligte sensitiewe strop bespreek wat nie noodwendig groot vis gaan vang nie maar defnitief met ‘n baie fyn aas aanbieding baie vis gaan verseker, vir die doel kan die hengelaar ‘n gly rietvlei strop gebruik  met 5 tot 7 lbs hoeklyne met hoeklyntjies wat 100mm tot 130mm lank is, nommer 0.08 of  nommer 1.0 Daitchi of Fear None hoeke met ‘n 18lbs tot 25lbs Skaglyn van 300mm tot 400mm lank en ‘n M0 mushroom sinker of ‘n M1 mushroom sinker. Vir die hengelaars wat nie noodwendig so baie vis wil vang nie maar eerder die groter vis wil teiken, maar nie noodwendig troffee vis nie (die hengel vir groot troffee vis is ‘n spesialis metode wat heeltemal apart bespreek behoort te word),  sal ek nogsteeds die gly rietvlei strop gebruik met ‘n paar veranderinge: ons verander die dikte van die hoeklyne na 9 lbs tot 12lbs hoeklyne met hoeklyntjies wat 100mm tot 130mm lank is, nommer 2 of  nommer 3 Daitchi of Fear None hoeke met ‘n 25lbs tot 35lbs Skaglyn van 200mm tot 300mm lank en ‘n M1 mushroom sinker of ‘n M1½ mushroom sinker.



Die volgende aspek wat ons na moet kyk is lyn dikte. Hierdie onderwerp kan baie manne ongelukkig maak en daar is verskeie opinies aangaande die onderwerp.  Vir die doel van die artikel gaan ek die lyn diktes net tot twee afdelings van  lyn diktes beperk. Eerstens, vir hengelaars wat werp van die oewer sal ek voorstel dat die hengelaars 5lbs tot 7lbs lyn gebruik, die doel van die dun lyn is om afstand te kan bereik, hoe dunner die lyn hoe makliker trek die lyn deur die lug met die werp van die aas. Dit is tog belangrik om ‘n redelike afstand te kan werp om sodoende genoegsame diepte water te kan bereik om sodoende vis te kan trek. Verwys gerus terug na die eerste artikel waar ons ook gekyk het na die belangrikheid van ‘n vol katrol wat help dat daar verder gewerp kan word. Tesame met die bespreking van die lyn diktes is dit nodig by die gebruik van die dunner hooflyne bv. 5lbs tot 10lbs om ook ‘n ‘Leaderline’ te gebruik.

Die ‘Leaderline’ is ‘n dukker stuk lyn aan die einde van die hooflyn geheg om as skok breker gebruik te word met die werp van aas sodat die lyn nie breek nie.  Die algemene standard vir ‘n ‘Leaderline’ is 2 stok lengtes en die diktes is van 18lbs tot 35lbs. Die meeste hengelaars gebruik 25lbs ‘Leaderline’ as ‘n reel. Ek verkies as dit kom by die ‘Leaderline’ om ‘n deurskynende, swart of wit lyn te gebruik.  Daar is wel hengelaars wat helder kleure gebruik, maar ek hou glad nie van dit nie, ek het met gekleurde ‘Leaderline’ gehengel op een stok as ‘n toetslopie en het defnitief ondervind dat die vis se byt tempo verswak. Ek glo die lyn is baie sigbaar vir die vis en dus verdryf dit die vis van die voerkol.

Die dunner lyn diktes moet slegs gebruik word waar die hengel dit toelaat, indien daar baie obstruksies is sal ek voorstel dat ons moet kyk na 10lbs lyn en meer, asook die strop verander na ‘n strop met een hoek, deur die boonste hoek te verwyder. Die rede vir die verwydering van die boonste hoek is dat die meeste vis, volgens my ondervinding van die afgelope 35 jaar, die onderste hoek se aas meer optel. Die strop met die een hoek sal verseker dat die kans dat die strop kan vashaak verlaag.  

Tweedens vir die hengelaars wat aasbote en ander bootjies gebruik om hul ase in te neem, sal ek voorstel dat hul kyk na 12lbs tot 18lbs lyn hooflyn as gevolg van die groter afstand wat meer kans het op vashaak indien daar enige obstruksies  is en as gevolg van die feit dat nie nodig is om so lig te hengel nie, aangesien daar nie gewerp word nie.

Volgende keer bespreek ons stok lengtes en so meer ……………..